Молитва первая
О преподобне отче, премудре наставниче и Боголюбезне подвижниче Несторе Летописче! Предстояй со дерзновением престолу Вечныя Славы, не забуди нас грешных и недостойных, бурями страстей отягченных, и ходатайством твоим непрестанным защити страну нашу, тебе присную, и соотчичи твоя от всяких зол и скорбей. Утверди сердца наша в православней вере, отечество свое научи любити и в братолюбии крепце пребывати. Настави нас на стези спасения, да молитвами твоими, заступниче наш, внидем в вечное Царство славы, восхваляюще Господа и прославляюще твое заступление во веки веков. Аминь.
Молитва вторая
Преподобне отче наш Несторе, явленный Господем всей земле нашей из небеси подобныя пещеры Киевския, да летописании твоими об изначальнем устроении страны нашея, светом Христовым просвещаемыя, и сказаниями о святых ея подвижницех просветиши умы и сердца наша светом Божественным. Ты бо, достохвальне богомудре книжниче, начертал еси святолепная жития отцев Печерских, ихже ныне ублажаем, не токмо тростию на хартии, но и на души твоей равным им подвижничеством. От юности желая святаго иноческаго образа, отче наш блаженне Несторе, и яко ученик добрый поучаяся у преблаженных первоначальников монашества на Руси Антония и Феодосия умерщвляти вся плотския страсти и возрастати в духовнем любомудрии, научи и нас стяжати совершенство веры и любве, чистоту телесную и душевную, нищету смиренную, послушание богоприятное, воздержание ревностное, молитву неразсеянную, бдение неусыпное во спасение душ наших. К сим же настави нас почитати наши духовные наставники, архипастыри и пастыри, учители и родители, и бегати от суеты мирския, да и нашими добродеянии прославляется Бог и укрепляется в единстве Церковь Православная. Дух неприязни и распри да изгнан будет от нас, имущих пред очесы своими образ кротости и послушания твоего, чтением твоих писаний, а наипаче же истинным покаянием. Добре подвизавыйся во ангельстем образе иноческаго жития и послужив в чине диаконстем, Богомудре наставниче наш Несторе, помози нам, да и мы, употребивши данныя нам таланты ко славе Божией, достигнем в меру возраста Христова. Свидетель быв многих чудес от честных мощей преподобного Феодосия, поминая же вечная лета, и по временных летех трудов летописания к Творцу веков преставився, честным твоим телом в чудесном нетлении почивая, сподоби молитвами твоими, богоносне отче, да и мы по летех мнозех земнаго жития нашего вписани будем в Книзе жизни вечныя Агнца Божия, Христа Спаса нашего, Егоже лета не оскудеют, и Емуже со Безначальным Его Отцем и Животворящим Его Духом подобает всякая слава, честь и поклонение, ныне и присно и во веки веков. Аминь.